مهزوم

من غير مواعيد بيهل العيد

والاقيك بتاخدني ونبعد لبعيد

حتي الضلمة القاها معاك فجر منور ..حدوتة جميلة

ونقول ونعيد

وسفينة نوح شيلانا معاها واحنا اللي نجينا م الطوفان

مع إن الميه كانت واصلة للسما

وكمان بتزيد

قلبي كان موهوم...دقاته كانت أعلي من موج البحر

وانا باضحك وباطمن قلبي الخايف

والضحكة الخايبة بإيه هاتفيد ؟

وانت واخدني بين أحضانك عند المرسي

وتقولي يا حبيبتي ما ترسي

إيه يعني لما أنا وانت هانغرق

هايقولوا علينا عاشقين

حبوا وغرقوا سوا

مش أحسن ماواحد فينا ها يغرق

ويسيب التاني غرقان ف بحر هموم

لاهو عارف يطلع ويعوم

ولا عارف حتي يعيش مهموم

يفضل يشكي لطوب الأرض

ويبكي ويقول مظلوم

ويطلع غلبه ع الأوطان والحرمان

ورغيف العيش التايه ف الطوابير

وانا وياهم واقف محروم

والميه واللقمة الناشفة

اللي بتجرح زوري

وموظف يسرق مني ويقول ببجاحة فين المعلوم؟

وامي ساعات بتزغرت وساعات بتصوت

وانا مش عارف ليه مهزوم ؟

لا انا لاقي جنيه ياولاد الأيه وعجيبه إن جنيهنا

وسط العملات واقف مأزوم