للشاعرة / فاطمة الزهراء فلا
يا سلة الجواهر واللولي والمرجان
ليه معاك نصيب ولا ماجاش الاوان
صدقيني أنا مش حزينة
ولا قلبي كان غضبان
لأنك عندي أغلي م. اللولي والمرجان
وتاريخك يا مصر باقي علي الجدران
حضارة ومنارة من كام ألف عام
ليه بقيت النهاردة سحابة سودا ودخان
ونيلك اللى وهبنا الحياة
وكان دايما سبيل مين يقول عطشان
لوثوه وجوا قلبه قساوة ألف حجر صوان
اتبدل حاله بعد ماكان ألوان
ودقة قلوبنا الهادية
صوتها أصبح يسد الودان
صفافير ... زمامير
دوشة بشر جنان ف جنان
والشجر اللى كان يضلل علينا أمان
دبحوه .... فرقوا ورقه وضاع بلا عنوان
فين الجناين !؟
والحبايب معدش ليهم مكان
آه يابشر ... حوشوا الخطر
جاى قرب كمان وكمان
صحتنا صبحت عدم...
وعلاجنا نضافة ... مش تصريحات وكلام
ولحن بنغنيه صبح ومسا
يطير للسما طيران
عمره ماكان غنوة وهتعدى
عمره ماكان....
حدوتة وكان يامكان...
